Quannu Lillu turnà da scola, salutà a so matri dicennuci: Ossabenadica e s'assittà na scala, ca dava `mmezzu `u curtigliu,
Doppu na dicina di minuti sbadiglià e taliannu versu `u celu ittà na vuci: oh mà ...fami haiu!
Ddra zia `nGilina, ca di pasta nun havia mancu un filu, pi curpa di ddra guerra `mmaliditta, s'affaccià e detti a Lilliddru du garrubbi longhi ca parivanu sciabuli: mangiasti chissi e cerca di fari silenziu!
Cu dù scacciuna Lillu si calà ddri garrubbi, ma, doppu na mezz'urata ni ddru curtigliu chjnu di suli, si `ntisi arrè: oh mà ...fami haiu!
Ddra povira svinturata di susu, sintennu ddri paroli ditti cu arruganza, si mortificava, cci viniva di chianciri e fari vuci! Ma subitu pinsà a ddra tanticchia di pasta ca, iorna primu, cci aviva cadutu nu casciuni.
Circà, sbruglià tra `i sarbietti, `mmezzu `i carti du pani da tessina e truvà un pugnu di cavatuneddraw. Li cuntà, eranu vintidù cu precisioni.
Subitu chiamà a so figliu Lillu: `a pasta la truvavu ma è picca, talè ca fari, và a Cicciuni nu zi `nToniu e ti fa inchjri sta sacchina di favi virdi!
Lillu a primu corpu dissi: no! Ma po' detti na taliata a ddri cavatuneddra ni li mani di so matri e suspirà. Di scattu `ncaglia ddra sacchina a volu e parti pi Cicciuni.
E a zia `nGilina: si Lillu porta i favi ...c'è a spranza di mangiari!
E Lillu arrivà veru na chiusa du zi `nToniu e si misi a chiamari: oh zi `nTo!..., e `u zi `nToniu `un arrispunniva. Vidiva a scecca, attaccata nu pizzucu davanti a rrobba, cu `u varduni ancora misu, tanti gaddri e gaddrini ca scaliavanu nu munnizzaru e pinsà: cca ava essiri!
Stava chiamannu arrè, quannu di `ncapu `u poiu spuntà `u zi `nToniu, cu un bummuliddru chjnu d'acqua du puzzu e a ddru carusu cci vinni `u cori.
Cchiuttostu meravigliatu, ddru vecchiu si rivulgì a Lillu dicennu: cu ti cci purtà ccà? Sulu vinisti? Chi vò di mia? Chi c'è cosa?
E Lillu riennu `a sacchina: me matri mi mannà ni vossia pi aviri quattru favi.
`U zi `nTò l'abbrazzà, cci asciucà `u suduri da frunti e a la svelta cci mmarrà ddra sacchina di favi virdi.
Felici, Lillu partì pi `u paisi carricatu. Arrivà `npunta `u curtigliu e ccu a solita cantilena: oh mà ... metti subitu `a pignata, ca purtavu `i favi!
Ddra mamma martiri, sintennulu, scinnì `i scaluna a dù a dù, cci livà `a sacchina di `ncoddru e cci detti na vasateddra a pizzicuneddra!
Sutta `u vontascala c'era cunzatu `u cufilaru e subitu ddra zia `nGilì apprinnì tanticchia di paglia mittennucci du ramuzzi d'auliva e quattru tozza di tavuli.
Misi `a pgnata `ncapu chjna d'acqua du Vutanu e si misi a scricchiari.
Appena spaccà `u vuddru ci calà `i favi e ddri vintidù cavatuneddra.
Mancu passaru cincu minuti e Lillu scattià: talìa si su cotti mà ... e pi risposta: zittuti vucca d'abbissu, ca ti sentinu `i vicini!
Propriu ni ddru mumentu trasì nu curtigliu Luvici, ca iva a cuvirnari `u cavaddru e si misi a diri: e chi iè stu çiauru... ah? Chi stati cucennu cosi boni? E Lillu scupirchiannu `a pignata: talìati cumpà ... sulu favi ... sulu favi!
Cu du pezzi ni li mani, a zia `nGilina, scinnì `a pignata e l'abbucca intra a sbirlonga. `U primu pinseri fu chiddru di dari `i favi a Luvici e circari di scansari `i cavatuneddra. Ma frattantu na picca parteru.
Passaru cincu minuti e trasì un cumpagnu di scola di Lillu, pi cupiari `i compiti e data l'occasioni lu ficiru mangiari, inchiennucci `a scuteddra e vidennu ca anchi stavota nni parteru nantri quattru di ddri cavatuna!
Lillu piglià `a cucchiareddra e arriminannu intra `a sbirlonga cci dissi a so matri: unni iè a pasta mà ... comu passa stu fattu!
E a zia `nGilina, cu un filiddru di vuci, cci arrispunnì ca nni detti na camella a ddra signura di `mpacci, pirchì era `ncinta e putiva spinnari!
`Ncavulatu, ddru Lillu si misi a mangiari: ogni cavatuneddru na cucchiarata di favi, ogni cucchiarata di favi un cavatuneddru e fici sè acchianati.
Si stuià `u mussu e taliannu a so matri `nsignu di rimproveru fici a `a sbummata: doppu tanta fatica e tanti strapazzi, chi mi tuccaru mà? Sè cavatuna e po' tutti favazzi!