Cantannu mi nn'acchianu a la muntagna,
cantannu supra lu carrettu miu,
lu cavaddruzzu certu nun si lagna,
ci dugnu vena e oriu quannu arrivu.

Rit.
E d'unni passu affaccianu
li schetti e li carusi,
l'anziani zitti ascuntanu
li canti me giniusi.

Li villici m'incontranu
mi fannu rivirenza,
cuntriti cu mia parlanu
facennu canuscenza.

Mi piaci stu gran sonu di cianciani,
di lu carrettu lu baculiari,
li retini e la zotta tegnu 'mani,
lu me cavaddru farzu allianari.

Cantannu mi nni scinnu a lu paisi
e lassu la muntagna a la scurata,
mi fannu cumpagnia li burgisi
s'intennu d'iddri qualchi sturnillata.

Lu cavaddruzzu portu a brivirari
a la Giateddra o puru a li Canali,
ni la tistera sonu di cianciani,
ncapu u carrettu scrusciu di quartari.

(parlato)
Trotta trotta cavaddruzzu
Lu stratuni è tuttu tò
Lu carrettu t'accumpagna
E la rota fa trò…trò…