Tu voli farfalleddra e 'ncapu 'i çiuri
ti posi gentilissima cu amuri,
su belli l'ali to, su culurati,
di li pittura parinu pittati.

Appena spunti tu 'mmezzu 'i jardina
dicemu: ''A primavera s'avvicina,''
e 'nfatti si 'u nnumani taliamu
su centu li farfalli ca cuntamu!

Si sempri assicutata e t'agguardari
fina d'un pappamuscu¹ 'nticchjnutu,
unni c'è fraschi assà nun ti pusari
ddra sutta c'è 'u scursuni addrummisciutu.

Si sbroglia e vidi a tia cu na vuccata
ti stringi tra li denti e già si morta,
sta allerta oh farfalleddra culurata
sennò da vita to si chiui 'a porta.

Oh farfalleddra fatti taliari
nun fari 'u ''zichi zachi'' quannu voli,
vicinu l'occhi me tu t'appusari
gudennuti l'oduri di violi.

Li picciliddri su tantu cuntenti
si tu ti posi adasciu 'ncapu 'i çiuri,
talìanu chiss'ali culurati
a ranni e nichi gioia tu cci duni.

Si 'nforza 'u ventu senza cumplimenti
comu un filu di paglia ti strascina,
ti porta assà luntanu ma o nnumani
tu torni a svulazzari ni jardina.

Oh farfalleddra tu porti armunia
ni li campagni e intra lu me cori,
li to culura su gioia pi mia,
si veru silinziusa quannu voli.


¹ Pappamuscu: piccolo volatile