Na festa veramenti riuscita,
fu fatta a San Caloriu l'eremita,
si vitti tanta genti 'nprucissioni
prighieri ogni du tri cu canti e soni.

Cu dava la so offerta riciviva
'u pani cu un gracioppu di racina,
cuntenti li divoti appressu a vara
passannu pi li strati di Favara.

Nu cursu luminaria e tammurina
facivanu lu cori ralligrari,
all'urtimu cu a chiazza tutta chjna
casteddrufocu pronti pi sparari.

A pprima botta l'arbuli trimaru,
li pàssari a migliara svulazzaru,
sbattivanu scantati ni li mura
pi ddri armaruzzi fu brutta avvintura!

Tra 'i stiddri bella scena di culura
casteddrufocu dignu d'ammirari,
a " 'Nguanta¹" cci sculavanu 'i sudura
pi fari beni e tuttu cumplitari.

N'applausu si 'ntisi e pi cunchiusa
na vuci dissi: "Festa aguriusa,"
a tutti San Calò navà aiutari
vasamulu e battemuci li mani.


¹ 'Nguanta: autore dei giochi pirotecnici