Ogni annu cca a Favara si ripeti
na festa ca rallegra lu paisi,
a organizzalla ‘u primu è l’Arcipreti
tra tutti battaglieru senza offisi.

Si onura d’accussì San Gisippuzzu
cu musica, minestri, canti e soni,
ni lu paisi nasci l’alligria,
si vidi tanta genti ‘nprucissioni.

Nu cursu li barracchi ‘nfilachera
su gioia pi li ranni e li carusi,
arrivanu d’arrassu ‘i forestera
pi assistiri a sfilati aguriusi.

Li gruppi folcloristici pi strada
abballanu spargennu l’alligria,
allietanu la genti urati sani
cu manzurcheddri e tanta melodia.

Pi tutta la simana li campani
si sentinu cchiù forti e cchiù frequenti,
a San Giseppi preganu ‘i cristiani
durante a Missa un populu prisenti!

Stu Santu cca a Favara è viniratu
cu gioia ranni e tantu, tantu amuri,
la genti all'arba scinni e va a la chiazza
pi cumplitari lu viaggiu ‘npiduni.

Pi tutti chissa festa è assà priziusa,
s’aspetta annu pi annu cu disìu,
lu cumitato lotta cu gran ‘mpegnu
‘ncunchiusa dici sempri grazii a Diu!